Lajme

LDK për sulmin me vezë ndaj Përparim Ramës: E bënë një grup i të rinjve që brohorisnin “Vetëvendosje”

Lidhja Demokratike e Kosovës është deklaruar pa

Lidhja Demokratike e Kosovës është deklaruar pas sulmit me vezë ndaj kandidatit të kësaj partie për kryetar të Komunës së Prishtinës, Përparim Rama, derisa ishte duke e zhvilluar një aktivitet në lagjen “Kodra e Trimave” në kryeqytet.

Zëdhënësja e LDK-së, Sibel Halimi, në një përgjigje për Gazetën Online Insajderi, thotë se Rama është sulmuar nga një grup i të rinjve të cilët brohorisnin “Vetëvendosje”.

Ajo shton se pas këtij incidenti, nuk ka vend për panik.

“Gjatë një takimi me qytetarët e lagjes “Kodra e Trimave” në oborrin e shkollës ‘Zenel Hajdini’ u sulmuam me vezë nga një grup i të rinjve, të cilët gjithashtu brohorisnin Vetëvendosje. Nuk ka vend për panik, Përparimi po vjen për Prishtinën!”, ka thënë Halimi.

Pas kësaj ndodhie, një reagim ka ardhur edhe nga vetë Rama, që përdori llogarinë e tij në Facebook, të flet për këtë ngjarje.

Ai ka thënë se takimet me banorët e Prishtinës dhe diskutimet e lira dhe të hapura janë bazë e lirisë së shprehjes.

“Takimet me banorët e Prishtinës dhe diskutimet e lira e te hapura janë baze e lirisë së shprehjes. Ka shumë të pakënaqur në qytetin tonë. Mirëpo nuk ka vend për panik. Prishtinës do t’i kthehet buzëqeshja e dashnia. #PR4PR”, ka shkruar Rama në Facebook.

Kandidati i Lidhjes Demokratike të Kosovës për kryetar të Komunës së Prishtinës, është sulmuar me vezë gjatë ditës së sotme. Derisa ishte duke e zhvilluar një aktivitet në lagjen “Vranjevc” të kryeqytetit, disa persona gjuajtën me vezë në drejtim të tij.

Sipas dëshmitarëve që shkrepën fotografi e pamje nga vendi i ngjarjes, dikush nga të pranishmit mori lëndime në kokë nga gjuajtja me vezë, por nuk bëhet fjalë për lëndime serioze.

Gazeta Insajderi.com ka komunikuar edhe me Policinë e Kosovës, institucion ky zyrtar të së cilës, shihen të kenë qenë në vendin e ngjarjes, por të njëjtit thonë se ende nuk kanë informacione lidhur me rastin.

Përparim Rama do të garojë nga radhët e LDK-së për të marrë pozitën e të parit të Prishtinës, në zgjedhjet lokale që do të zhvillohen më 17 tetor.

Përveç tij, në garë për të marrë në dorë timonin për drejtimin e kryeqytetit janë edhe Uran Ismaili nga Partia Demokratike e Kosovës, Daut Haradinaj nga Aleanca për Ardhmërinë e Kosovës, Selim Pacolli nga radhët e Aleancës Kosova e Re, ndërsa partia më e madhe në vend, Lëvizja Vetëvendosje nuk e ka zyrtarizuar ende emrin e kandaditit të saj për Prishtinën. /Insajderi.com