Lajme

Kurti: Kosova të bëhet një vend ku mund të jetohet mirë e jo prej ku iket nga dëshpërimi

Kryetari i Vetëvendosjes, Albin Kurti, tha sot

Kryetari i Vetëvendosjes, Albin Kurti, tha sot se Qeveria e ardhshme e vendit do të punojë për të përmirësuar jetën e qytetarëve, duke pasur prioritet drejtësinë dhe duke e lidhur arsimin me punësimin e të rinjve, në mënyrë që Kosova të bëhet një vend me perspektivë ku mund të jetohet mirë e jo prej ku iket nga dëshpërimi, njofton Insajderi.

Këto komente Kurti i ka bërë gjatë një takimi me ambasadoren e Finlandës në Kosovë, Pia Stjernval, nga e cila mori urime për fitoren bindëse të Lëvizjes Vetëvendosje në zgjedhjet parlamentare të 14 shkurtit.

Duke folur rreth temës së marrëdhënies Qeveri-Kuvend, Kurti tha se përkushtimi për një bashkëpunim sa më cilësor mes këtyre dy institucioneve do të jetë në qendër të qeverisjes së re.

Në fund, të dyja palët ndanë bindjen që me konsolidimin e qeverisë së re do t’i thellojnë marrëdhëniet bilaterale mes dy shteteve tona, thuhet në njoftimin e Lëvizjes Vetëvendosje në Facebook./Insajderi.com