Kosovë

Grupi 6+ e shantazhon dy herë për një muaj Qeverinë Hoti

Deputeti i Grupit Parlamentar 6+ – Fikrim Damka, i përkrahur nga shefi i këtij grupi, Rasim Demiri – përgjatë seancës së Kuvendit të mbajtur gjatë ditës së sotme ka shantazhuar qeverinë Hoti se, në rast të mos-shkarkimit të ambasadorit kosovar në Francë, Qëndrim Gashit, 6+ nuk do të votojnë ligjet e propozuara në Kuvend në seancat e ardhshme. I njëjti grupacion politik, një muaj më parë, paralajmëroi se në rast të hapjes së ambasadës së Kosovës në Jeruzalem, do largohej nga përbërja e legjislaturës së shtatë.

Damka përgjatë fjalimit të tij, të mbajtur në Kuvend, ka kërkuar që urgjentisht të shkarkohet ambasadori Gashi. Nëse nuk ndodh një gjë e tillë, deputeti ka thënë se grupi parlamentar 6 + nuk do të votojnë asnjë nga ligjet që do të inicohen për votim në seancat e ardhshme, shkruan Gazeta Express.

Reklamo bizensin tuaj ketu

Përderisa nuk tërhiqet nga pozita e ambasadorit, si 6 deputetë të Kuvendit dëshirojmë t’u informojmë se nuk do të votojmë asnjë ligj në seancat e ardhshme, jashtë ligjeve të COVID-19 dhe projektligjeve për rimëkëmbje ekonomike”, ka thënë përfaqësuesi i komuniteteve jo-shumicë.

Një muaj më parë, i njëjti deputet deklaroi se grupi i tij ishte ndarë i pakënaqur nga marrëveshja e arritur në Uashington mes Kosovës dhe Serbisë, me theks të veçantë me pikën e hapjes së ambasadës së Kosovës në Jeruzalem.

Ne do të shqyrtojmë qëndrimin tonë nëse hapet ambasada në Jerulazem. Qeveria duhet t’i ketë parasysh të gjithë, edhe pikëpamjet tona”, deklaronte ai.

Nga marrëveshja për normalizim ekonomik ndërmjet Kosovës dhe Serbisë, lindi edhe njohja e ndërsjelltë e sovranitetit të shtetit kosovar nga Izraeli. Kësisoj, Kosova nga marrëveshja historike obligohej që të hapte Ambasadën në Jeruzalem të Izraelit.

Ministria Turke e Punëve të Jashtme lëshoi një deklaratë mbi ambasadën e planifikuar të Kosovës në Jeruzalem duke thënë se “është zhgënjyese që një hap i tillë, i cili do të përbënte një shkelje të qartë të ligjit ndërkombëtar, merret në konsideratë nga autoritetet e Kosovës”.

Sidoqoftë, përgjatë një prononcimi për Gazetën Express, Rasim Demiri, shef i Grupit Parlamentar të 6+, tha se qëndron prapa deklarimeve të deputetit dhe se ato janë unitare.