Maqedoni

Emra të rinj në rrugët e Shkupit, në mesin e tyre edhe persona të gjallë

Propozimet e emrave të rinj të rrugëve, shesheve, urave dhe objekteve tjera infrastrukturore në Shkup pritet të marrin dritën jeshile në seancën e këshillit të qytetit, që mbahet të martën. Pas reagimeve të shumta në opinion për emrat e përzgjedhur, nga komisioni për emërtime thanë se lista e emrave është propozuar nga qytetarët, organizata dhe shoqata të ndryshme.

Përzgjedhja e emrave nuk ka kërkuar kritere të posaçme, përveç faktit që personat të mos jenë të gjallë. Pavarësisht këtij kriteri, disa nga emrat në këtë listë jetojnë.

Nga propozimet janë hequr emrat dhe termat që janë tashmë në Regjistër dhe ato terma që mund të shkaktojnë polemikë dhe ndarje. Përfshirja e njerëzve të gjallë nuk është e zakonshme, të propozuarit janë kontaktuar dhe kanë pranuar’ deklaroi Bojan Ivanoviq, kryetar I Komisionit për emërtimin e rrugëve.

 

Ndër emrat e propozuar janë: Abdyl Frashëri, Azem Marana, Arbëria, 28 Nëntori, Azem Hajdari. Mirëpo, gjenden edhe emrat e figurave të reja si biznesmeni tashmë i ndjerë Enver Maliqi, gazetari Sefer Musliu dhe karateisti Enver Idrizi, që është figurë e gjallë. Profesori

Vebi Bexheti vlerëson se emrat e personaliteteve duhet të jenë të gjithanshëm dhe t’i përballojnë të gjitha sfidat e kohës dhe ngjarjeve që sjell koha.

Duhet të ketë figura të paluhatshme. Mos të na ngjaj edhe në të ardhmen ashtu siç ngjau me Shkupin 2014. Nuk jam kundër personaliteteve më të reja por megjithatë nëse e marrim një personalitet që për një moment të caktuar ka pasur rezultate shumë të mëdha në nivelin botëror, megjithatë duhet shikuar aspektet tjera të gjithanshme të tij që ti përballoj kohës, jo të nisemi nga një meritë e një segmenti. Mendoj se këto çështje duhet trajtuar në mënyrë pak më serioze, më profesionale dhe duhet shkuar pse jo edhe në emrat e kohës së ilirëve, fiseve ilire që kanë jetuar në këto troje’ pohoi Vebi Bexheti, profesor.

 Gjithashtu, profesori Bexheti vlerëson se përzgjedhja e emrave të personaliteteve duhet të bëhet në mënyrë institucionale.

Melihate Rustemi

The post Emra të rinj në rrugët e Shkupit, në mesin e tyre edhe persona të gjallë appeared first on Alsat.