Lajme

AAK e mbështetë plotësisht protestën e thirrur nga infermierët e vendit

Deputeti i Aleancë për Ardhmërinë e Kosovës, Sh

Deputeti i Aleancë për Ardhmërinë e Kosovës, Shemsedin Dreshaj, ka informuar se partia e tij e mbështet protestën që kanë thirrur infermierët e Kosovës, njofton Insajderi.

Dreshaj pohon se infermierët duhet të jenë heronj në vepër dhe jo vetëm në letër.

“Që nga fillimi i pandemisë COVID-19 e deri më sot, infermierët dhe i gjithë stafi shëndetësor ka bërë punë vetëmohuese. Kërkesat e tyre drejtuar Qeverisë së Kosovës janë krejtësisht të drejta”, ka shkruar Dreshaj në Facebook.

Ai tutje ka thënë se Qeveria duhet sa më parë të ndajë buxhet për rritjen e pagesës së ndërrimeve të natës për infermierë, pagesën e punës gjatë vikendeve, orët shtesë të punës si dhe pagesën e rrezikshmërisë në punë.

Dreshaj ka theksuar se Qeveria sa më parë duhet të sjellë në Kuvend Ligjin e Pagave.

“AAK ka qenë gjithmonë pro këtij ligji. Përmes Ligjit të Pagave duhet t’u mundësojmë kushte të dinjitetshme infermierëve tanë. Infermierët tanë duhet të jenë heronj në vepër e jo vetëm heronj në letër”.

Ai ka folur dhe për shtesat e infermierëve që janë ndaluar dhe tha në vend të saj po paguhet rryma për serbët në veri. “Ka qenë dashtë të ndodhte e kundërta”.

Dreshaj ka thënë se Qeveria shkelur mbi parimin e barazisë së qytetarëve dhe legalizuar krimin në ver, me ndaljen e shtesave me arsyetimin se nuk ka buxhet, ndërsa mori vendim që t’i paguajë 11 milionë euro serbëve në veri për rrymën e shpenzuar.

“Infermierët dhe i gjithë stafi shëndetësor janë heronjtë e ditës së sotme dhe ata meritojnë të trajtohen dinjitetshëm”, ka përfunduar Dreshaj. /Insajderi.com