Lajme

100 vite nga anëtarësimi i Shqipërisë në Lidhjen e Kombeve, Meta: Akt unik në historinë e kombit

Presidenti Ilir Meta përkujton anëtarësimin e S

Presidenti Ilir Meta përkujton anëtarësimin e Shqipërisë në Lidhjen e Kombeve, si sot, 100 vjet më parë.

Në një postim në “Facebook”, Meta shkruan se ky “akt unik në historinë e kombit” sanksionoi vendin si subjekt të së drejtës ndërkombëtare, përforcoi sovranitetin, rikonfirmoi pavarësinë dhe vendosi garanci për kufijtë e caktuar nga Konferenca e Ambasadorëve të Londrës të vitit 1913.

Kreu i shtetit gjithashtu shpreh mirënjohje për kontributin e presidentit amerikan Thomas Woodrow Wilson,  në hedhjen e themeleve të paqes në Europë, si dhe krijimin e konceptit të kombeve me të drejta të barabarta.

Postimi i plotë i presidentit Ilir Meta:

Si sot, 100 vjet më parë, Shqipëria pranohet anëtare me të drejta të plota në Lidhjen e Kombeve. Ky akt unik në historinë e kombit tonë, sanksionoi shtetin shqiptar si subjekt të së drejtës ndërkombëtare, por mbi të gjitha përforcoi sovranitetin, rikonfirmoi pavarësinë dhe vendosi garanci për kufijtë e caktuar nga Konferenca e Ambasadorëve të Londrës të vitit 1913.

Mundi, sakrificat dhe luftërat e popullit shqiptar, sidomos përpjekjet diplomatike të patriotëve, kudo ku ndodheshin, veçanërisht të Federatës Patriotike “Vatra” dhe kryetarit të delegacionit shqiptar në Lidhjen e Kombeve, Fan S. Noli, u kurorëzuan nëpërmjet këtij akti jashtëzakonisht të rëndësishëm, që e pranoi Shqipërinë, edhe pse të lodhur e të copëtuar nga Lufta e Parë Botërore, si të barabartë mes të gjitha kombeve, me të drejtat dhe detyrimet, që buronin nga anëtarësimi në këtë organizatë.

Mirënjohje për kontributin e spikatur të Presidentit amerikan Thomas Woodrow Wilson, i cili nëpërmjet planit të tij prej 14 pikash hodhi themelet e një paqeje të barabartë në Europë, krijimin e konceptit të kombeve me të drejta të barabarta, pavarësisht madhësisë së tyre dhe vizionin për një organizatë të sigurisë kolektive si Lidhja e Kombeve.


Etiketa: ,